Categories
Constitutional Development Politics

Diskors ta’ Immanuel Mifsud waqt dimostrazzjoni tan-Netwerk ta’ Soċjetá Ċivili

Diskors qed jiġi riprodott bil-permess tal-awtur.

Tliet snin ilu, fl-okkażjoni ta’ Jum ir-Repubblika, il-President Coleiro Preca għamlet diskors li fih appellat lis-soċjetà ċivili biex din ixxammar il-kmiem u taħdem hija wkoll għall-ġid tar-Repubblika. F’dak id-diskors, il-President saħqet li d-demokrazija tal-pajjiż teħtieġ li s-soċjetà ċivili tkun soċjetà kritika “li tirrifjuta li tkun oġġett tal-istorja, li tinsisti li taqsam mal-politiċi r-responsabbiltà li tittrasforma l-bejta umana.”

Dak li qalet il-President ifisser, fi kliem ieħor, li s-soċjetà ċivili – aħna – għandna responsabbiltà li fil-fehma tiegħi għadna m’aħniex nieħdu u li wasal iż-żmien li verament nieħdu r-riedni li d-demokrazija tagħtina f’idejna.
Minkejja l-progress li dan il-pajjiż għamel matul is-snin, is-soċjetà ċivili għadha ma saritx soċjetà kritika. Ir-raġuni primarja għal dan hija li għadna nħallu f’idejn il-politiċi biex imexxu huma; għadna bil-ħsieb li l-pajjiż huwa tagħhom; anzi, agħar minn hekk, għadna naċċettaw li aħna tal-politiċi minflok il-politiċi huma tagħna.

Biex dak li qalet il-President tar-Repubblika tliet snin ilu mqar jibda jseħħ, jeħtieġ nitgħallmu ngħidu lill-politiċi li d-demokrazija ma tiddependix minnhom iżda mis-soċjetà kritika li ma tiddejjaqx tgħid le fejn jeħtieġ li jingħad le. Soċjetà kritika hija soċjetà li ma tiddejjaqx tikkritika lill-partiti; li temmen li l-kritika lill-pajjiż mhijiex tradiment iżda impenn; li l-partit qiegħed hemm għaliha u mhux hi għall-partit.

Snin ilu xi ħadd kien għamel diskors li fih kien elenka numru ta’ ħolmiet li kellu, ħolmiet li setgħu dehru impossibbli. Ma tgħaddilix minn moħħi li nipprova nimita dak id-diskors imma aċċettajt li niġi hawn illum – u naf li ħafna kienu dawk li ssorprendew irwieħhom li tlajt fuq dan il-palk – appuntu għaliex anki jien għandi ħolma. Jien verament nixtieq li nimxu lejn mument u sitwazzjoni li fihom is-soċjetà ċivili tkun hi li tmexxi l-pajjiż bil-ħiliet kritiċi tagħha; li dal-pajjiż ma jibqax blata b’mentalità tribali li minnha jgawdu biss dawk il-ftit li għandhom il-poter; appuntu li l-poter ma jibqax jiġi effettwat minn fuq għal isfel; li l-istudenti tagħna, fl-istituzzjonijiet postsekondarji u terzjarji ma jibqgħux ikunu politiċi billi jikkompetu bejniethom bit-tessera fil-but; li l-vot ikun verament ħieles; li l-mezzi tax-xandir, minbarra li jirrispettaw l-intelliġenza tagħna ma jibqgħux imarrduna b’din l-iskiżofrenija li fuq kollox hija giddieba; li l-libertà tal-espressjoni – il-buzzword il-ġdida – nifhmu xi tfisser eżattament u nibdew neżerċitawha b’responsabbiltà u b’kuraġġ; li għax tkun soċjetà kritika tkun, awtomatikament, soċjetà pluralista u li dan jiġi rifless mhux biss fil-ħajja ta’ kuljum imma anki fis-sala prinċipali ta’ dan il-bini t’hawnhekk.

Matul iż-żmien qalulna ħafna affarijiet: qalulna bdiet rebbiegħa ġdida; qalulna żmien il-bużullotti spiċċa; qalulna wasal terremot mill-isbaħ; qalulna li pajjiżna tagħna lkoll; li konna taħt tmexxija soda; qalulna li dan hu l-aqwa żmien. U aħna emminniehom; kull darba emminniehom. Iżda soċjetà kritika m’għandhiex taċċetta kollox kif ġie ġie: għall-kuntrarju għandha tistaqsi, għandha żżomm għajnejha miftuħa.

Iltqajna hawnhekk ukoll wara dak li ġara ftit tal-ġimgħat ilu, meta xi ħadd iddeċieda li għandu jsikket lil xi ħadd ieħor, ipoġġi bomba fil-karozza u jżid vittma oħra. L-istorja ta’ dan il-pajjiż tfakkarna, fix-xahar ta’ Diċembru, fi tfajla li fetħet pakkett li ma kellha qatt tiftħu, u f’ġuvni li qagħad sa tard filgħaxija f’kamra fejn ma kellux jibqa’, għax xi ħadd iddeċieda li jimposta l-bombi u jispara fejn ġie ġie. Persważ li nittamaw li dan l-aħħar każ ma jispiċċax bħal dawn it-tnejn: mitlufa fit-trab tal-istorja, bil-feriti miftuħa beraħ.

Bdejt billi kkwotajt lill-President tar-Repubblika u nagħlaq b’sentenza oħra minn tagħha li nħoss li għandha tiggwida u tispira t-triq ’il quddiem: “Repubblika li tibża’ mill-intellettwali, li toħnoq, tirredikola jew tinjora l-ħsieb kritiku, hija Repubblika dgħajfa u waħda li ma laħqitx il-milja tagħha.”

Grazzi ħafna.
Immanuel Mifsud
Il-Belt, 3 ta’ Diċembru 2017

Categories
Politics

Rush coming up

Jiġu mumenti fejn nipprova nimmaġina meta’ kien il-mument li waqafna nimxu u bdejna niġru. Niġru fis-sens li ma niefqux biex naħsbu u li inħallu il-mezzi ta’ komunikazzjoni jaħsbu minflokna. Filli konna hemm nifirħu bl-emanċipazzjoni tal-individwu u li issa kellu il-poter f’idejħ u filli kull ħajt virtwali u kull forum possibbli qed jintela’ bil-vomtu kwotidjan mingħajr ħafna ħsieb.

Fausto sejjħilhom graffitti. Sewwa qal. Anki jekk f’idejn esperti anki il-graffitti jafu jġiegħluk taħseb. Imma illum mhux graffiti biss għandna. Għandna il-kummenti, il-kontrokummenti, l-osservazzjonijiet mundani u personali. Għandna is-search engine u l-wikipedia. Għandna l-aħbarijiet “on tap” u l-“opinion polls” instantanji. U fil-baħar ta’ “data” l-individwu emanċipat safa dik il-gżira li John Donne qalilna li ħadd ma hu.

**

Iħħakkjaw il-kont elettroniku ta’ Bashar Al-Assad dittatur ġewwa s-Sirja. Skoprew li waqt li mijiet ta’ Sirjani kienu taħt attakk ġewwa Homs, id-dittatur u martu kienu qed jordnaw il-linef u d-DVD ta’ Harry Potter minn fuq x-xibka ta’ l-eteru. Jaħasra kemm miet kmieni Salvador Dali. Kienet tkun xena surrealissima li seta jiġbed ma Picasso. Biss biss Pablo kien ikollu jkabbar it-tila ta’ Guernica biex ma jpinġix biss il-bombi neżlin imma anki l-vann tad-DHL jew UPS qed iwassal il-linef fid-dar tad-dittatur.

U ta’ Harry Potter mhux tajba jew? Kemm hi belha din Asma (hekk jisimha martu l-Ingliża) kos. Tordnalek il-kopja legali tal-film ma jmurx tikser il-liġi u tidħol fuq xi Pirate Bay tniżżel it-torrent. Fejn taf, jekk jispiċċaw quddiem il-Qorti Kriminali Internazzjonali ikollhom akkuża inqas għal xiex iwieġbu il-koppja Al-Assad. Massakru ċivili – IVA, korruzzjoni u tkasbir tad-drittijiet – IVA, download illegali – LE ta… dak ordnajtu fuq PLAY.COM onorevoli… delivery b’xejn kieku kont fl-Ewropa.

**

Irrekordjaw lil Julian Galea. Irrekordjaw lil Joanna Gonzi. Joanna ma ħarġitx għall-elezzjoni. Julian ma setgħax jirtira l-kandidatura. Ivvutawlu xorta. Imbagħad irriżenja. Għax ħass li aħjar. Ivvutawlu xorta. Dik l-iktar biċċa affaxxinanti. Kellhom kollox għad-disposizzjoni tagħhom. Il-massa tal-medja wasslitilhom kull bit u byte tar-recording. Ivvutawlu xorta.

Ħal-Qormi għandhom sindku ġdida. Naqra naive. Imsieħba f’sit ta’ “hostesses” taljani. Hostesses kienet saret kelma sinonima mal-Kavallier tal-Italja li ħadem tant għal ġieħ u unur in-nisa tal-Italja. Li ma nifhimx hu jekk dawn in-nies humiex konxji tal-konsegwenzi tal-preżenza tagħhom fuq ix-xibka virtwali. Fil-Festschrift Immanuel Mifsud tagħna stampa ċara ta’ dak li sejjaħ bħala il-konfessjonarju ta’ Foucault. F’J’accuse semmejna kemm il-darba kif kien hemm perijodu fejn il-blogs servew ta’ mera ħarxa li uriet il-kruhat tas-soċjeta tagħna. Ma konniex nafu jekk aħniex lesti għalihom dawn il-veritajiet.

Bħal Alice fil-pajjiż tal-meravilji sirna, diffiċli tifhem dak li hu veru u dak li hu virtwali. Forsi la nifhmu li dak li ilna insejħu virtwali huwa biss estensjoni tal-veru forsi hemmhekk biss nimxu l-quddiem.

**

Cyrus Engerer il-politikant bla kostitwenti bena dar fuq Facebook. Mill-kampanja tad-divorzju il-quddiem bena persunaġġ virtwali. Cyrus il-laburist li qiegħed bilmod ilmod iżarma l-ewwel maskla reali li kien bena fil-bidu tal-karriera politiku tiegħu meta kien Cyrus in-Nazzjonalist li forsi (forsi) kien jirrekordja lil kollegi tiegħu meta’ jkunu f’xi dagħdigħa ta’ bejn il-ħbieb – just in case.

Franco Debono imur il-parlament bħala deputat nazzjonalista. Anki Jeffrey Pullicino Orlando. Imbagħad meta taqbżilhom u jridu jiftħu l-mitraljatriċi tal-kritika jidħlu fuq Facebook jagħmlu xi status update. “Does RCC have a blog?” kienet waħda mill-aħħar enigmi ta’ Franco. Sa fejn nafu aħna m’għandux blogg RCC. Konna nistednuh għall-bloggata guest – imqar għall-kurzita biex naraw x’ikollu xi jgħid.

Sadattant blogs oħra li nibtu waqt il-falsa stikka tal-elezzjoni li qatt ma kienet mietu fuq ommhom. L-azzopardinicky’s tal-mument kienu posposti għal mument opportun. Kien kmieni wisq biex iżżomm ritmu ta’ elezzjoni. Dan jafu Muscat li issa inbela f’nassa ta’ prattikament prim ministru kostanti sa mill-inqas is-sena d-dieħla.

**

U Simon Busuttil li ma jridhiex tas-suċċessur predestinat qed jisħaq fuq komunikazzjoni. S’issa kull meta tniffes, tniffes biex jgħidilna li jew iridu jisimgħu iktar jew iridu jikkomunikaw aħjar dak li qed jagħmlu. Għax dak li qed jagħmlu huwa tajjeb.

Li għadna ma smajniex minn Simon Busuttil huwa jekk hux se jkollu messaġġ li jwassal, hux se jkollu kontenut ġdid, jew inkella aħniex se jkollna biss reċiklaġġ u stinar fuq messaġġi li ilhom li intilfu fil-kaos tal-eteru. X’se jisma’ Simon? Il-graffitti fuq il-ħitan?

**

Ilna niġru. Bl-Ingliż ngħidu “to rush” u qlibniha tirraxxja. Bħal dak li bela’ l-ecstasy u ma baqax jagħmel sens. Għax il-moħħ jaħseb sew meta jirrifletti u mhux meta jispara bl-addoċċ. Il-moħħ huwa l-ewwel għodda. Id-dinja virtwali – dik l-estensjoni tad-dinja reali – għandha potenzjal qawwi. Enormi. Pero jekk naqbdu niġru biha ma ndumux ma nsibu l-ewwel ħajt u nibqgħu deħlin dritt ġo fih.

Categories
Festschrift 2012

immanuel mifsud – il-blobb tas-sibt filghaxija

I only met Immanuel for the first time at the Frankfurt International Book Fair last year. Until then Immanuel was a series of labels – virtual and reported. Besides being an acclaimed author, Immanuel was also this reference point on the blogosphere – something like a Maltese version of the east European authors who I had always pictured as dark. gloomy and depressing. It is the obligation of the wordsmith to tell the story as he sees it. Oftentimes the crudeness of the product is painful to the reader – even objectionable. Immanuel makes you sit up in shock and then, as the goosebumps begin to settle, you tend to remark: “Oh. Right”. Immanu-el… now let’s skip the idolatry and get down to his post:

IL-QRARA TA’ NARĊISSU

Storja (vera):

Is-seklu għoxrin. Is-snin erbgħin. Wieħed raġel semilitterat għandu għarusa semilitterata wkoll. Forsi minħabba t-tensjoni tat-Tieni Gwerra Dinjija (għaddejja fl-aqwa tagħha), il-biża’, il-preżenza prominenti tal-Mewt, jibgħat kartolina lill-għarusa. Fiha mhemm xejn miktub. Mad-dawra hemm daqs nofs ċentimetru bizzilla, fin-nofs hemm qalb imdawra bil-ward aħmar u f’nofs il-qalb hemm figura ta’ tfajla liebsa libsa u ġuvni liebes il-ġlekk u l-ingravata. Xi erbgħin sena wara din il-kartolina titfaċċa minn imkien. It-tifla tal-koppja (miżżewġa, familja, tfal tat-tfal u t-tfal tagħhom) issib din il-kartolina u taqla’ ċamata għaliex għall-omm dak huwa dokument privat li ma kellha ebda dritt tarah, turih, tmissu. Il-kartolina ngħatatilha b’sinjal ta’ mħabba u bħala dokument intimu.

Tliet Stejjer (veri):
12 ta’ Jannar 2012.

Fuq Facebook L.Milne kitbet lil C.DeBono: “Where are you based at the moment, gorgeous shag muffin?”
C.DeBono wieġbet nofs siegħa wara: “London, you sexicious mound of quivering love pudding…let’s meet up and talk nonsense xx”
Biex imbagħad L.Milne wieġbet lura: “Ohhhhh indeed – I will be down at some point this month! Let’s get naughty!!!!! Xxxxxxxxx”


12 ta’ Frar 2012
Dejjem fuq Facebook, Krista A., qamet kmieni u kitbet: is is glad that Her baby Really ENJOYED hi$ Valentine’s Gifts :’) ♥♥
I LoveeYouuuu Daniel (: xXx
Ħdejn il-messaġġ kien hemm indikat li dan intbagħat minn “Near Luqa”.


Nataxa mitilha l-maħbub f’daqqa. Wara xhur għadha tiktiblu fuq il-wall tal-Facebook tiegħu u ttella’ ritratti tagħha fil-banju nofsha mgħottija bil-bżieżaq tas-sapun. Fit-tmien anniversarju minn mindu bdew joħorġu flimkien, kitbitlu: “. D.you are so far away. And so close. As always. I am crying. Come back to me.”

Ma’ dawn ix-xbihat, uħud mill-1271 ħabib li għandi fuq il-FB tiegħi tellgħu ritratti tagħhom qegħdin 1) jiżżewġu; 2) jitbewsu; 3) jimteddu fuq is-sodda tal-lukanda li qagħdu fiha meta marru Londra għax-xiri u dik tal-farmhouse li qagħdu fiha meta marru l-karnival tan-Nadur; 3) jixxemxu bil-bikini li kienu għadhom kemm xtraw minn Tas-Sliema; 4) jimitaw lil Charlie’s Angels; 4) jitrekknu mal-ħajt b’daharhom u b’ħarsithom lejn il-kamera, 5) iħarsu lejn il-mera tat-twaletta tal-kamra tas-sodda tagħhom waqt li huma stess jippuntaw id-digital camera lejn il-mera u jikklikkjaw dik il-buttuna; 6) juru pala waħda ta’ saqajhom (ħafna jew b’żarbun b’takkuna pencil/stiletto) flimkien ma’ ċirku ta’ paliet tas-saqajn ta’ nies oħrajn; 7) iserrħu l-pala ta’ idejhom fuq mejda bi dvalja tal-bizzilla t’Għawdex made in China biex juru l-aħħar sett dwiefer foloz impittra; 8) f’pożi suġġestivi jekk mhux kompromettenti oħra.

Foucault kien diġà tkellem fuq is-soċjetà konfessjonali fis-snin sebgħin. Tassew nixtieq inqajmu mill-mewt u forsi anki niftaħlu kont fuq il-FB ħa nara xi tkun ir-reazzjoni tiegħu għall-konfessjonaliżmu stil Seklu 21. Appuntu, l-isfukar bejn il-privat u l-pubbliku, l-internet bħala għajn kbira li tinċitana nkunu privati dejjem aktar fil-pubbliku dejjem aktar, huma wħud mill-fehmiet li Foucault kien lemaħhom f’tekniki ta’ poter oħrajn. Ma’ dan il-konfessjonaliżmu, jew inkella minħabba fih, tispikka l-personalità narċissistika tal-bniedem tat-triq taż-żminijiet tal-lum: mhux biss il-konfessjonijet għal kollox inutli fuq il-FB u t-Twitter, imma wkoll – ġaladarba ngħixu fl-era tal-immaġni u fl-aċċessibilità diġitali – ir-ritratt li neħtiġuh biex jiddokumenta, jew jikkonferma l-qrara.

Xi darba, il-qrar kien isir fil-konfessjonarju, fis-sodda matrimonjali, f’xi karozza bil-ħġieġ imtappan tittarraf mal-Irdum Dingli. Illum il-konfessjonarju żżarma, is-sodda ħarġet fil-ġnien, ul-ħġieġ tal-karozzi m’għadux jittappan.

Nixtieq nifraħ lil Jacques li ssaporta u għadu jissaporti l-istorbju kollu fix-Xibka u nifraħlu li għadu mhux qed ibati mit-tniġġiż tal-ħoss madwar l-Akkuża.